မသိုးထမင်း မသိုးဟင်း

မိုးက ကျလာတယ်ဆိုရုံလေး၊ သည်းလည်းမသည်း၊ တဖွဲဖွဲ မနေ့ညကတည်းက
ဒီလိုပဲရွာနေတယ်။ လျှပ်လည်းမလက်၊ မိုးကလည်းမခြိမ်း၊ လေကလေးကတော့
တချက်တချက် ဆောင့်တိုက်တတ်တယ်။

အဲဒီအခါမှာ ဝရန်တာက သံဆန်ခါ
တွေကိုကျော်ပြီး မိုးစက်ငယ်တချို့က ဘုရားဝတ်ပြုနေတယ့် ဒေါ်မယ်ဝန်ရဲ့
ပခုံးစွန်းနဲ့ လက်မောင်းကို လာနှုတ်ဆက်တတ်ကြတယ်။ ဘုရားရှိခိုးနေပေမယ့်
စိတ်ကတော့ မိုးရေစက်တွေလို နေရာအနှံ့ ရောက်နေမိတယ်။။ သွားလေသူအတွက်
အမျှအတမ်းဝေပြီး ကြေးစည်ကို အသာအယာတီးလိုက်တယ်။ ကြေးစည်သံဟာ
လွမ်းလွမ်းဆွတ်ဆွတ် တိုးတိုးညင်ညင်သာသာ ပျံ့လွင့်သွားတယ်။

ကြေးစည်ကိုဒီလိုမတီးယင် အခန်းထဲမှာ အိပ်နေတဲ့မြေးကြီး လန့်နိုးသွားမှာ စိုးရတယ်လေ။
ဒေါ်မယ်ဝန်ရဲ့ စိတ်ထဲမှာတော့ ကျေးဇူးရှင် ဦးထွန်းအေးရုပ်နဲ့ ဒီမြေးဦးနဲ့ ရုပ်က
တထေရာတည်းပဲတဲ့၊ သိပ်တူတာပဲ၊ ဒေါ်မယ်ဝန် သေချာပေါက်ပြောလိုက်ပါရဲ့။

ဒီမြေးက ကိုထွန်းအေးမှ ကိုထွန်းအေး၊ ဒါကြောင့် မြေးကြီးကိုအသက်လိုချစ်ပြီး၊
အတိုင်းအတာမရှိ အလိုလိုက်နေမိတယ်။ ဒေါ်မယ်ဝန်ရဲ့ နှလုံးကို လှည့်ပတ်နေတဲ့
သွေးတွေထဲ မြေးကြီးရဲ့သွေးတွေပါ လှည့်ပတ်နေတယ်လို့ ထင်မိတယ်။ ဒီသွေးတွေ
က နှလုံးသားကို ဖြတ်စီးကြတာလေ။

တမြန်နှစ်က ဒီလိုရက်၊ ဒီလို မိုးတစိမ့်စိမ့်၊ ဒီလို မိုးအေးနေတဲ့ရက်၊ မနက်
အိပ်ရာကတော်တော်နဲ့မထလို့ ဦးထွန်းအေးတော့ အိပ်ကောင်းကောင်းနဲ့ အိပ်ပျော်
နေတယ်လို့ပဲ သူထင်မိတယ်။ တဖက်အိမ် ရေဒီယိုက စံတော်ချိန် စိန်ဘမောင်
တီးလုံးသံကြားတော့မှ နှိုးမလို့ သွားကြည့်တော့ ညာဘက်စောင်းလို့ ခွေခွေကလေး
အိပ်နေသလိုပါပဲ၊ အိပ်နေတယ်ထင်လို့တောင် လှုပ်နှိုး ကြည့်သေးတယ်။

ခေါင်းကိုက်တယ်၊ ဇက်ထိုးတယ်လို့လည်း ပြောသံမကြား၊ ဗိုက်အောင့်တယ်၊
အောက်ပိုင်းလေးတယ်လို့မှ ပြောသံမကြား၊ အခုလို မမျှော်လင့်ပဲဗြုန်းကနဲဆိုတော့
ဒေါ်မယ်ဝန် မြေလူးရရှာတာပေါ့၊ ရူးမယ်ဆိုယင် ရူးနိုင်တယ်။ ဦးထွန်းအေးက
ကပ်စေးနဲတယ်လို့ ပြောပြောနေတဲ့ ဒေါ်မယ်ဝန် အသိတရားတခု ရင်ထဲမှာ
သံမှိုစွဲသလို စွဲသွားတယ်။

''လူ့အသက်လောက် ဘယ်ဟာကမှအဖိုးမတန်ပါကလား''
ဒီအဖြစ်ဆိုး၊ အပျက်ဆိုးကို သားနဲ့ချွေးမရှိရာ ဆည်တော်ကြီး ဆည်မြောင်းဌာနက
ကြေးနန်းစက် အကူအညီနဲ့ အကြောင်းကြားလိုက်ရတယ်။ ဖြောင့်မတ်တဲ့ ဝန်ထမ်း
ကောင်းလည်းဖြစ်ပြန်၊ လူချစ်လူခင်များတဲ့ ပင်စင်စားကလည်းဖြစ်ပြန်၊ ရပ်ရေး
ရွာရေး လက်မနှေးကြပဲ အပြေးကူညီတတ်တဲ့ ဇနီးမောင်နှံမို့ ပင်စင်စား အသုဘ
တွေထဲမှာတော့ ဦးထွန်းအေး အလောင်းဟာ မြေအကျကောင်း၊ မြေအကျလှ
ရှာပါတယ်။

..........................

အဖော်ရအောင် ချွေးမကိုအိမ်ခေါ်ထားတော့ သားဖြစ်သူရဲ့ စားအိုးကလည်း
တအိုးကနေ နှစ်အိုးဖြစ်သွားတယ်လေ။ အမေနဲ့ဇနီးကို သားကလည်း တတ်နိုင်
သလောက် ထောက်ရှာပါတယ်။ ဆင်က တကောင်ထဲ မဟုတ်တဲ့အပြင် နှမ်းက
အလုံးသေးပြီး နည်းနေလိုက်သေးတယ်။ ဒေါ်မယ်ဝန်တို့လည်း ကျန်ကောင်းကျန်ရာ
ပင်စင်လေးနဲ့ ခြစ်ခြုတ်ပြီး စားသောက်ကြရတယ်။ ချွေးမကလည်း အချုပ်အလုပ်
ကလေးတွေ အိမ်ယူပြီးချုပ်ရှာပေမယ့် စားစရိတ်၊ နေစရိတ်တွေမြင့်လာလို့
ပိုလျှံတယ်တို့၊ စုစုဆောင်းဆောင်းတို့ မရှိရှာဘူး၊ တလနဲ့တလ အလျင်မီဖို့
မချေးချင်ပဲ ချေးကြရတယ်။

မုဆိုးမဆိုတော့ သိပ်မချေးချင်ကြဘူးလေ။ ဒါကြောင့်
အတတ်နိုင်ဆုံးမချေးရအောင် သိုသိုသိပ်သိပ် ပိပိရိရိ နေထိုင်စားသောက်ကြတယ်။
ဒီလိုကြားထဲ ချွေးမတော်က အိပ်ရာအထမှာ ပျို့သတဲ့။ အဲဒီနေ့က ဦးထွန်းအေး
ဆုံးတာ ငါးလပြည့်တဲ့နေ့၊ ချွေးမကတော့ ဘယ်မှတ်မိမလဲ၊ ဒီလို နေ့တွေမှတ်
ရက်တွေမှတ်တာတို့ အတိတ်နိမိတ်ကောက်တာတို့ဆိုတာ မုဆိုးမ ပူပူနွေးနွေးတွေရဲ့
အလုပ် မဟုတ်လား။

ဒီလိုလာပြီးတိုက်ဆိုင်နေတာကို ဒေါ်မယ်ဝန် အံ့လည်းအံ့သြမိပါရဲ့၊ ဝမ်းလည်းသာ
ပါရဲ့၊ အံ့သြတာနဲ့ ဝမ်းသာတာ ချိန်စက်ကြည့်ယင် ချိန်ခွင်လျှာက ဝမ်းသာတဲ့
ဘက်ကို သာသာထိုးထိုး ညွှန်းလိမ့်မယ်။ ဒါကြောင့် ချွေးမ ကိုယ်ဝန်ဆောင်တာကို
ကိုယ်တိုင် ကိုယ်ဝန်ဆောင်နေရသလိုပဲ ဒေါ်မယ်ဝန် စောင့်ရှောက်တယ်။ မုဆိုးမ
ဘုရားရှိခိုးယင် ဆုတောင်းတွေ များရတဲ့အထဲ၊ အခုတော့ သားယောက်ျားလေး
ထွန်းကားဖို့ ဆုတောင်းတခု တိုးလာပြန်တယ်။

ချွေးမရဲ့ လုံးလုံးဝန်းဝန်း ဗိုက်ကိုကြည့်ပြီး ဒီလို စူစူ ချွန်းချွန်းကလေးဆိုယင်
သားယောက်ျားလေး မွေးမတဲ့။
မောင်အောင်မောင်းကြီးတုန်းကလည်း ဒီလိုစူချွန်းချွန်းပဲတဲ့။ ချွေးမရဲ့ လုံးဝန်းတဲ့
ဗိုက်ကို သူလိုရာဆွဲပြီး စူချွန်းပစ်လိုက်တယ်။ ဒီကိုယ်ဝန်ရှိမှ ဦးထွန်းအောင်
အကြောင်း အိပ်မက် ခဏခဏမက်တယ်တဲ့။ ဝတ်ဖြူစင်ကြယ်နဲ့တမျိုး၊ သင်္ကန်း
ဆီးလို့တခါ၊ စိပ်ပုတီး လည်မှာဆွဲလို့တကြိမ်၊ အိပ်မက်ကောင်းတွေချည်း မက်
တယ်၊ ခက်တာတခုက သူ့ချွေးမကမမက်ပဲ ဒေါ်မယ်ဝန်ကချည်း မက်တာမို့၊
အိပ်မက်ကို ပြောင်းလို့ရွှေ့လို့ရယင် ပြောင်းမက်စေချင်တယ်။ ချွေးမကိုလည်း
အိပ်ယာဝင်ယင် ဘုရားရှိခိုးအိပ်ဖို့နဲ့ ရတနာသုံးပါး ဦးထိပ်ထားဖို့ ခဏခဏ
မှာရတယ်။ အိပ်မက်ဆိုတာ စိတ်ကောင်း နှလုံးကောင်းရှိမှ အိပ်မက်ကောင်း
မက်တာ မဟုတ်လားတဲ့။

ဘာပဲဖြစ်ဖြစ် သားယောက်ျားလေးသာမွေးယင်
ဦးထွန်းအေး ပြန်လာတာပဲ ဖြစ်ရမယ်လို့ မျှော်လင့်နေရှာတယ်။
အနှစ်လေးဆယ်နီးပါး အတူပေါင်းလာတော့လည်း နေရာတကာ သွားလေသူကို
သတိရစရာချည်းပဲပေါ့၊ သမကုန်ဝယ် စာအုပ် မြင်ယင်လည်း သတိရ၊ မဆုံးခင်က
အိမ်ကို ရေနံချေးသုတ်ဖို့ စီစဉ်ခဲ့တာကိုပဲ နောင်အတွက် အမြော်အမြင် ကြီးပါပေ့
ဆိုပြီး ကျေးဇူးတင်မိ၊ သတိရမိ။ ရပ်ရေးရွာရေး ဖိတ်စာတွေမှာ ခါတိုင်းလိုမဟုတ်ပဲ
ဒေါ်မယ်ဝန့်နာမည်တခုတည်း ရေးထားတာ မြင်ယင် လည်း သတိရ၊ သာရေး
နာရေး ဖိတ်စာတွေမှာ ဦးထွန်းအေးနာမည်ကို လက်သည်းကွင်းခတ်ပြီး ဖိတ်ယင်
လည်း တသမိ။ နေရာတကာမှာ သတိရစရာချည်း ဖြစ်နေတော့တယ်။

အိမ်ရှေ့ကပိတောက်ပင်ကြီးကို မိုးကြိုးထိတော့မှ ဒီပိတောက်ပင်ကြီးရဲ့ အရိပ်နဲ့ ပိတောက်
ပန်းရဲ့ အနံ့ကို လွမ်းဆွတ်နေရသလိုပါပဲ။ သွားလေသူရဲ့ အရိပ်ကြီးမားကြောင်း
သူမရှိခါမှ သိတော့တယ်။ မုဆိုးမဆိုတာ တယ်လည်း လူရာမဝင်ပါလားဆိုပြီး
အာှးုယ်ရတာလည်း ခဏခဏ၊ ဒီလို အားကိုးရာမဲ့လွန်းလို့ ဦးထွန်းအေး မဆုံးပါးပဲ
ဒေါ်မယ်ဝန်ပဲ ဆုံးပါးလိုက်ချင်တော့တယ်။

လောကရဲ့ အကြပ်အတည်းစုံ၊ ဒုက္ခစုံကို
ဒေါ်မယ်ဝန် တယောက်တည်း ရင်ဆိုင်နေရပြီ၊ ဒါပေမယ့် သူ့စိတ်ကိုတော့
လျှော့ချလို့ မဖြစ်ဘူး၊ မျှော်လင့်ချက်နဲ့ အသက်ရှင်ပြီး ဒီမျှော်လင့်ချက် ဓားမတိုနဲ့
သောကပူဆွေး ခြုံနွယ်တွေကို လမ်းထွင်ရှင်းလင်း ခရီးဆက်ရမယ်လေ။'သားအချစ်
မြေးအနှစ်'ဆိုတဲ့စကားကို ရှေးလူကြီးသူမတွေ အကြောင်းမဲ့ ထားခဲ့ကြတာ
မဟုတ်ဘူးဆိုတာ ဒေါ်မယ်ဝန် နားလည်နေပြီ။

.................................

မြေးဦး 'ဇော်ဝိတ်'ရဲ့ မျက်လုံးနဲ့ ပါးစပ်ပေါက်က ကိုထွန်းအေးနဲ့ တထေရာ
တည်းပဲတဲ့၊ ချွေးမကလည်း တူသလိုလိုပဲတဲ့။ တခါတလေတော့လည်း ဖွားအေက
'သည်း'နေလို့သာ တူလိုက်ရတာ၊ သူ့စိတ်ထဲမှာတော့ တယ်ပြီးတူတယ်လို့
မထင်မိဘူး။ သူ့အမျိုးသား ကိုအောင်မောင်းနဲ့ပဲ တူစေချင်တာပေါ့၊ ဒေါ်မယ်ဝန်က
သွေးနုသားနု ချွေးမအတွက် စိုးရိမ်တာအပြင် သူ့မြေး ဇော်ဝိတ် ကြီး
နေမကောင်းမှာစိုးလို့ ချွေးမကို မတည့်တာတွေ မစားဖို့ပြောရတယ်။ မီးနေသည်
ထမင်းဟင်းကို သူလည်းပဲ မီးနေသည်လုပ်ပြီး ချက်ပြုတ်စားလိုက်တယ်။
ဒီလိုစားမှလည်း အကုန်အကျ သက်သာမယ်မဟုတ်လား။

မြေးအသစ်ကျပ်ချွတ်ကို နှိုက်ချွတ်နေပြန်တော့လည်း စိတ်သက်သာရာရမလား
အောက်မေ့မိတယ်၊ သူ့ဖိုးအေနဲ့ တူလွန်းလို့ ဆိုပြီး သွားလေသူကိုသတိရပြန်ရော၊
အော် မုဆိုးမဘဝဆိုတာဟာ တယ်လည်း ပင်ပန်းဆင်းရဲလှပါတကားလို့ ဒေါ်မယ်
ဝန် တွေးမိတယ်။ ရှေ့လျှောက် ဘယ်လောက်ဆင်းရဲ ပင်ပန်းရအုံးမှာပါလိမ့်။
ပူဆွေးခြုံနွယ်၊ ဆင်းရဲပင်ပန်းခြုံနွယ်တွေ ထူထပ်လွန်းလှပါလား။

..........................

မြေးကြီးကျောပူခေါင်းပူထတာ ဒီနေ့ဆိုယင် ရှစ်ရက်မြောက်ပြီ၊ ဒီညနေ ဆရာဝန်ဆီ
သွားပြဖို့တောင် တော်တော်စဉ်းစားနေရပြီ၊ ဗမာဆေးများ ပြောင်းတိုက်ရယင်
ကောင်းမလား၊ ငွေကလည်း ခပ်ခက်ခက်၊ ဘေးအိမ်ကလည်း အယင်ယူထား
တာမပြေပဲ ထပ်ယူဖို့မကောင်းတော့၊ နောင် ဘယ်နှစ်ရက် ဖျားနေအုံးမယ်မသိ၊
ဒေါ်မယ်ဝန်ရင်ထဲက သောကမီးကျီးမီးခဲဟာ ရဲနေအောင် တောက်နေပြီ၊ သူ့အဖိုး
ကိုယ်ပွားလေးဆိုတော့ စိုးရိမ်တာ၊ စိတ်ပူတာ အထွတ်အထိပ်ကို ရောက်နေတာပေါ့။

မြေးကြီးရဲ့ အသက်ရှည်ဖို့က လောလောဆယ် အရေးကြီးဆုံးပဲ မဟုတ်လား။
ဒီမှန်ဗီရိုကို ဖွင့်မကြည့်ဖြစ်၊ ဖွင့်ချင်စိတ်လည်းမရှိ၊ ဗီရိုထဲက ဦးထွန်းအေးရဲ့
အဝတ်အစားအသုံးအဆောင်တွေက အလွမ်း မပြေစေပဲ၊ အလွမ်းဝေစေတတ်တယ်
မဟုတ်လား၊ သော့တံကို သော့ပေါက်ထဲထည့်ပြီး ဒေါ်မယ်ဝန်တွေနေမိတယ်။

သူအခါခါ စဉ်းစားတယ်။ စဉ်းစားယင်း ငယ်ထိပ်ချိုင့်၊ မျက်တွင်းဟောက်ပြီး၊
ကြုံလှီလာတဲ့ ဇော်ဝိတ်မျက်နှာကို မြင်မိတယ်။ အယင်က ဝဖြိုးပြီး ချစ်စရာ
ကောင်းတဲ့ ဇော်ဝိတ်ဟာ သူ့အဖိုးနောက်ကို လိုက်တော့မှာလားလို့ ပူပန်မိတယ်။
သော့တံကို ညာဘက် လှည့်လိုက်တော့ ဗီရိုထဲက ပရုတ်နံ့က ခုန်ထွက်လာတယ်။

အဝတ်အစား အသုံးအဆောင်တွေက ဦးထွန်းအေး ထားခဲ့တဲ့အတိုင်း အရာမယွင်း
သေး။ ရုပ်အလောင်းပေါ်က လွှားတဲ့ ဘန်ကောက်ပုဆိုးတထည်နဲ့ တခြား
ချည်လုံချည်တထည်သာ ဘုန်းကြီးကို 'နေကထိုင်'အဖြစ် ပြင်ချုပ်ပြီး လှူလိုက်
တာပဲ လျော့သေးတယ်။ ကိုအောင်မောင်းကြိုက်တဲ့ ပုဆိုးအဆင်နု အကွက်စိပ်
ကလေး တွေတောင် မပေးရက်။ သားကလည်း အလိုက်တသိ၊ မယူ။ သူ့သုံးနေကျ
လက်ကြယ်သီးတွဲကလည်း စီးကရက် ၅ဝ-ဝင် သံဘူးဟောင်းထဲမှာ ဒီအတိုင်း၊
မုတ်ဆိတ်ရိပ်ဂျုပ်နဲ့ ဓားတွေလည်း သန့်သန့်ရှင်းရှင်း၊ လက်ကိုင်ပုဝါ အသစ်
ကလေးပေါ်က လျှော်ပြီး ဖွပ်ပြီး လက်ကိုင်ပုဝါလေး ၄၊၅-ထည်က ထပ်လျက်၊
ရုံးဆင်း ရုံးတက်သုံးခဲ့တဲ့ ပိုင်းလော့ဖောင်တိန်ကလည်း သူ့သခင် အငြိမ်းစား
ကတည်းက သူ့လည်း ရေမိုးချိုးပြီး အငြိမ်းစာယူလျက်၊ အလုပ်ကြိုးစား၊
အလုပ်ပျက်ရက်မရှိလို့ ဆုရတဲ့ ပတ်ကားဖောင်တိန် ကလည်း ပတ်ကား
ဂျပ်သေတ္တာလေးထဲမှာ အသစ်အတိုင်း။

ဂုဏ်ယူစရာ ပစ္စည်းတခုအနေနဲ့ ဦးထွန်းအေးက ဒီပတ်ကားဖောင်တိန်လေးကို
မြင်သာအောင် ဂျပ်သေတ္တာအဖုံးလေးကို ဖွင့်ထားလှပ်ထားတယ်။ ဖောင်တိန်ကို
ဖိထားတဲ့ ဖဲပြား အစိမ်းရင့်ကလေးကတော့ အနုသွေးဘက်ကို လုစပြုနေပြီ။

ဂျပ်သေတ္တာရဲ့ မျက်နှာကျက်က ပိုးစဖြူဖောင်းအိအိ ကလေးပေါ်က ပတ်ကားဆိုတဲ့
စာလုံးအနက်နဲ့ ရွှေမျှားတံကလေးက သစ်လွင်တောက်ပနေ တုန်းပဲ။ ရန်ကုန်
နေပြည်တော် နာရီတိုက်ကဝယ်လာတဲ့ 'အိုဂျီဘယ်'နာရီလေးလည်း သူရဲ့ ကတ္တီပါ
နက်ပြာရောင် သေတ္တာထဲမှာ မှေးစက်နေရှာတယ်။ နာရီဆိုင်ကိုပြင်ဖို့ တခါမှ
အလည်မသွားတဲ့ နာရီအမျိုးမို့ ဦးထွန်းအေးက သိပ်မြတ်နိုးတဲ့နာရီလေး။ ရွှေရောင်
နာရီအိမ်က တောက်နေပေမယ့် သော့သီးကတော့ ရွှေရောင်ပြယ်ပြီး ရွှေဖြူရောင်
သန်းနေပါပြီ။ ဒီနာရီအမျိုးက ခေတ်မမီတော့ပေ မယ့်၊ နာရီအမျိုး အကောင်းအဆိုး
ခွဲခြားသိသူ ဦးထွန်းအေးရဲ့ အကြောင်းသိသူတွေကို နာရီကလေးက ဖွင့်ဟထားတဲ့
နာရီ ဂျပ်သေတ္တာလေးထဲကနေ လက်ယပ်ခေါ်နေတယ်။ ဗီရိုကို မလွဲသာလို့သာ
ဖွင့်ရတယ်၊ ဒေါ်မယ်ဝန်မှာ နည်းနည်းမှ စိတ်ထဲမှာ မကောင်းလှ။

ဟယ်.........မတတ်နိုင်ပါဘူး၊ ဒီနည်းကလွဲပြီး တခြားနည်း မရှိတော့တာမို့ ...။
သူ့ရဲ့လက်ဟာ ရှပ်အင်္ကျီအထပ်ရဲ့ အောက်ကိုသွင်းလိုက်တော့ ဟိုဒီစမ်းနေစရာ
မလို၊ တန်းကနဲ စမ်းမိတယ်လေ။ လူပျိုဘဝကတည်းက တပ်ခဲ့တဲ့ ရွှေကြယ်သီး
တစုံဟာ ဗီရိုမှာခင်းထားတဲ့ သတင်းစာအဟောင်းနဲ့ ညိနေသေးတယ်။ ဒီကြယ်သီး
အစုံကို လက်ထဲမှာဆုတ်ထားယင်း သူ့နားနှစ်ဖက်က ရွှေပါးနဲ့ ပြင်သစ်ကျောက်
နားကပ်တစုံကို သတိရမိတယ်။ ဇော်ဝိတ်ရဲ့အဖျားက ဘယ်နှစ်ရက်ရှည်နေအုံးမှာ
မသိနိုင်တာမို့၊ နားပေါက်ဟောင်းလောင်းနဲ့ မုဆိုးမကို ကဲ့ရဲ့ကြမယ့် မျက်လုံးတွေ
ကို မြင်နေယင်း၊ နားကပ်ကလည်း ထုခွဲလို့ ဘာမှမရတဲ့အတူတူ ကိုထွန်းအေးရဲ့
ကြယ်သီးအစုံကိုပဲ ပိုင်ရှင်ပြောင်းဖို့ စိတ်ပိုင်းဖြတ်လိုက်ရတယ်။

ရင်ထဲကတော့...ဘယ်ချိမလဲ။သူ့မြေးကြီးလာတော့ ဒါ ဘယ်သူ့ပစ္စည်းလဲလို့ ပြပြီး အရင်ဘဝ
အကြောင်းတွေ ပြန်မေးစရာ၊ ပြစရာပစ္စည်းတခုတော့ လျော့သွားရှာပြီ၊ ဇော်ဝိတ်
မြန်မြန်ကြီးစေချင်၊ စကားတွေ ပြောတတ်စေချင်လှပြီ၊ စကားတွေတတ်ယင်
ဘာတွေများ ပြောမှာပါလိမ့်၊ သူ့အမေကို ဘယ်လိုခေါ်လို့၊ သူ့ကိုရော ဘယ်လို
ခေါ်လိုက်မှာပါလိမ့်။ တနေ့တနေ့ ဒါတွေပဲ မုဆိုးမတွေး တွေးနေတယ်။

.....................

ဇော်ဝိတ်ကတော့ ထုခွဲလိုက်တာလေး ကုန်ခါနီးမှာ နာလန်ထလာတယ်။ လေးဘက်
သွားကနေ မတ်တတ်ရပ်ချင်လို့ ဖျားတာ၊ ဝမ်းသွားတာကိုပဲ ဒီအဖျားမျိုးက
ကိုထွန်းအေးလည်း ဖျားတတ်သတဲ့၊ တခါဖျားယင် တငွေ့ငွေ့နဲ့ ၄၊၅၊၁ဝ-ရက်
မပျောက်ဘူးတဲ့။ နာလန်ထကို အားရှိစေချင်တဲ့ ကလေးအမေနဲ့ အဖွားကလည်း
အယူအဆကွဲနေရသေးတယ်။

'သမီး ကလေးကို ပဲအိုးကပ်ကလေးနဲ့ ထမင်းပျော့ပျော့ကလေး ဆီဆမ်းဆားဖြူး
ပြီးခွံ့ပါကွယ်၊ ကြက်ဥတော့ မကျွေးနဲ့၊ ကလေး ဝမ်းပုပ်နေပါ့မယ်။ ကြက်ဥက
ချုပ်လည်းချုပ်တတ်တယ်'တဲ့။

တကယ်တော့ ဝမ်းပုပ်မှာ ဝမ်းချုပ်မှာထက် ကြက်ဥစားယင် အယင်ဘဝက
အကြောင်းတွေ မပြောမှာစိုးပြီး ဟန့်နေရှာတာလေ။

ဇော်ဝိတ်က မတ်တတ်ရပ်စ။ တလှမ်းနှစ်လှမ်း လှမ်းနိုင်စအရွယ်၊ တိန်ချိုလား
ချိုလား သီချင်းဆိုပြီး ထိန်းယင်း ဒေါ်မယ်ဝန်က ဦးထွန်းအေး ၂-နှစ်လည်
ဆွမ်းကျွေးအတွက် တွက်ချက်နေမိတယ်။ မနှစ်က ဘုန်းကြီးငါးပါး ဆွမ်းကပ်တာနဲ့
မိသားစု စားတဲ့ စားရိတ်နဲ့ ဒီနှစ်တော့ ဘယ်နည်းနဲ့မှ မလောက်မှန်းသိတယ်။

အလှူကြီး အတန်းကြီး မပေးနိုင်ပေမယ့်၊ ကျေးဇူးရှင်ကို အောက်မေ့တသ ကျေးဇူး
ဆပ်တဲ့အနေနဲ့ ဆွမ်းကပ်ပြီး အမျှအတမ်းဝေချင်သေးတယ်။ တနှစ်မှာ တခါလုပ်ရ
တာမို့ ဒီလိုနှစ်လည် ဆွမ်းကျွေးကိုတော့ သူသေတဲ့အထိ အတတ်နိုင်ဆုံး ကျွေးသွား
ချင်တာပဲ။ ဒီဆွမ်းကျွေးအတွက် ကြိုပြီး စုဆောင်းပြင်ဆင်ပေမယ့် ဘယ်လို
စုလို့မှမရဘူး၊ ငွေကုန်စရာတွေ တမျိုးပြီးတမျိုး၊ ရပ်ရွာနဲ့လူမှုရေးစရိတ်၊
စားစရိတ်တွေကို အလျင်မီအောင် မနည်းလိုက်နေ ရတယ်။

ငွေက ဒေါ်မယ်ဝန်အဖို့ သိပ်လက်ကြားယိုလွယ်တာပဲ၊ ဒါပေမယ့် မတတ်နိုင်ဘူး၊
ဦးထွန်းအေး အတွက်ဆိုတော့ မဖြစ်ဖြစ်အောင် စီစဉ်တယ်။ သား အောင်မောင်းကိုလည်း
ဆွမ်းကျွေးအမီလာဖို့ လူကြုံနဲ့မှာလိုက်တယ်။ ချွေးမကိုလည်း ဦးထွန်းအေး ကြိုက်တဲ့ ငါးပတ်မွှေ
ချက်နဲ့ သီးစုံချဉ်ရေတော့ မပါမဖြစ်တဲ့ ဆွမ်းဟင်းအဖြစ် ချက်ခိုင်းတယ်။

ကိုအောင်မောင်း အိမ်မပြန်လာတာကြာပြီမို့ သူပြန်လာတော့ ဒေါ်မယ်ဝန်က
ဝမ်းလည်းသာ၊ အားလည်းရှိတာပေါ့၊ ဇော်ဝိတ်ကလည်း ပျော်တာပေါ့၊ သူ့မယား
ကတော့ အပျော်ဆုံး။ ဒီလိုပျော်ရလို့ ဆွမ်းကျွေးအတွက် အလုပ်များပင်ပန်းတာတွေ
ခဏမေ့သွားကြတယ်။

ဆွမ်းကပ်တဲ့နေ့တော့ ဒေါ်မယ်ဝန်အဖို့ အဟောင်းတွေ အသစ်ပြန်ဖြစ်ရှာတယ်။
မနက် အိပ်ယာက ထကတည်းက မျက်စိမျက်နှာမကောင်းလှ၊ ညကလည်း
ကောင်းကောင်းအိပ်ပျော်ပုံမရ၊ ဘုရားရှိခိုးယင်း ပုခုံးပေါ်ကတဘက်နဲ့ မျက်စိမှာ
တွဲခိုတဲ့ မျက်ရည်စတွေကို သိမ်းရ၊ တို့ရတယ်။ မျက်ဝန်းနံဘေးက အရစ်
အကြောင်း၊ ဇရာလမ်းကြောင်းတွေထဲမှာ မျက်ရည်ငွေ့တွေ ပျံ့နေကြတယ်။

ရက်ပေါင်း ၇၃ဝ-ဟာ မနေ့တနေ့ကလိုပါပဲ။ မနက်ခင်း မြန်မာပိုင်းအစီအစဉ်
ပြီးကြောင်း ကြေညာသံကို ကြားနေရ တယ်။ ဆရာတော်များ ကြွမလာကြသေး၊
ဒေါ်မယ်ဝန်ကတော့ ဒီဆွမ်းကျွေးအစီအစဉ်ကို မြန်မြန်ပြီးသွားစေချင်လှပြီ၊ အစက
ဒီလောက်စိတ်ပင်ပန်း နွမ်းလိမ့်မယ်လို့ မထင်မိ၊ အချိန်တွေ မြန်မြန်ကုန်သွား
စေချင်တာပဲ ဒေါ်မယ်ဝန်သိတယ်။ ဆရာတော်၊ သံဃာတော်မျာလည်း ပြည့်ပြည့်
စုံစုံ ဘုဉ်းပေးကြရတယ်။

ရေစက်ချတော့ ရေစက်ခွက်ထဲ ဒေါ်မယ်ဝန်ရဲ့
မျက်ရည်စတချို့ ရောသွားကြတယ်။ အမျှဝေသံက ခါတိုင်းထက်ပိုပြီး တုန်ယင်
နေတယ်။ ဆရာတော်များ ပြန်ကြွသွားလို့ အိမ်သားတွေ လက်ဆုံစားကြပြန်
တော့လည်း ဒေါ်မယ်ဝန် ထမင်းစားလို့မကောင်း၊ 'ဆန်ဖြူနဲ့ ဟင်းကောင်း'မို့
ဟိုသားအမိ သားအဖသုံးယောက်က မြိန်ရေရှက်ရေ စားကြတယ်။

ကိုအောင်မောင်း သူ့အဖေရဲ့ မှန်ဗီရိုနားက ခဏခဏ ဖြတ်သွားနေပေမယ့် ဗီရိုထဲကိုတော့
လှမ်းမကြည့်မိ၊ လှမ်းကြည့်ယင်လည်း အဝတ်အစားနဲ့ အသုံးအဆောင်တွေက
အယင်ကလို နေသားတကျပါပဲ၊ သူ့နေရာနဲ့သူ။ သေသေချာချာ ဂရုစိုက်ကြည့်မှ
ပတ်ကားဖောင်တိန် ဂျပ်သေတ္တာတဲ့ နာရီသေတ္တာတွေဟာ ခါတိုင်းလို ဖွင့်ရက်
မဟုတ်ပဲ၊ ပိတ်ထားတာ တွေ့ရလိမ့်မယ်။

ဒေါ်မယ်ဝန် ကလည်း သံယောဇဉ် ကြီးတယ်။
ဒီဂျပ်သေတ္တာခွံလေးတွေကိုတော့ မရောင်းဘူး၊ ဟန်မပျက်ပေါ့၊ ချန်ထား
လိုက်တယ်။ မုဆိုးမ မဟုတ်လား၊ ဟန်ကိုယ့်ဖို့ဆိုတဲ့ စကားလည်း အရှိသား၊
ဘယ်သူက ဒီလိုထုခွဲတဲ့အလုပ်ကို လုပ်ချင်မလဲ။

ညီပုလေး
စံပယ်ဖြူ၊ နိုဝင်ဘာ၊ ၁၉၈၅။