အမေ့စာ
အေးသန္တာကျော်တစ်ယောက် အခန်းထဲကို ခုန်ပေါက်ပြီး ၀င်လာကတည်းက လေးခင် သိလိုက်သည်။ သူ့အိမ်မှ စာလာသည်ပဲ ဖြစ်ရမည်။ မိုးလုံးလေလုံးတမျှ ကြွားဝါသည့် စကားတွေကို ကြားရဦးမည်မို့ မသိဟန်ပြုကာ စောင်ကို ခေါင်းမြီးခြုံပြီး အိပ်နေလိုက် ချင်သော်လည်း မကောင်းတတ်လွန်း၍ စားပွဲမှာ ဟန်မပျက် ထိုင်နေလိုက်ရ၏။
သို့တိုင်အောင် နောက်ကို လှည့်မကြည့်ဘဲ စာထဲမှာ အလွန်စိတ်ဝင်စားနေဟန်ဖြင့် ခေါင်းကို စိုက်ထားလိုက်သည်။ ပြီးတော့မှ သင်္ချာစာအုပ် ဖြစ်နေသည်ကို သတိရကာ ခဲတံဖြင့် ဟိုခြစ်သည်ခြစ် လုပ်ရပြန်၏။ သို့တိုင်အောင် အေးသန္တာကျော်အသံက နားထဲသို့ တိုးဝင်လာသည်။ နှစ်ယောက်တည်း ရှိသည်ဆိုတော့ သူ့စကားကို စိတ်မ၀င်စားသော်လည်း အသိအမှတ်ပြုဟန် ပြရ၏။
“သိပ်ပျော်သွားပြီ မလေးရေ၊ သိပ်ပျော်သွားပြီ”
“အိမ်က စာလာတယ်ပေါ့လေ”
“ဒါပေါ့”
အေးသန္တာကျော်သည် ခုတင်ပေါ်ပစ်လှဲကာ စာအိတ်ကို ဖောက်မဖတ်မီ ရုပ်ရှင်ထဲကလို ရင်ခွင်မှာအပ်ကာ ၀မ်းသာဟန် လုပ်နေလိုက်သေးသည်။ လေးခင်သည် အမေ့ဆီက စာမလာ တာ ကြာပြီကို သတိရကာ “မမကြည်တို့မအားလို့ နေမှာပဲ” ဟု တွေးလိုက်မိ၏။
အေးသန္တာကျော်သည် စာအိတ်၏ တစ်ဖက်ထိပ်မှ စာဖောက်ထားမှန်း မသိနိုင် လောက်အောင် ဘလိတ်ဓားလေးဖြင့်လှီးပြီး ဖွင့်သည်။ ပြီးတော့ သူ့ပြုမြဲထုံးစံအတိုင်း စာကို မီးရောင်ကြောင့် ကောင်းကောင်း မမြင်ရသည့်ပုံဖြင့် လေးခင်ဘက်သို့လှည့်ကာ ဖြန့်ဖတ်သည်။ အင်္ဂလိပ်စာလုံးများနှင့် မြန်မာစာလုံးများ ရောနေသောစာကို လေးခင် မမြင်ချင်ဘဲ မြင်ရပြန်သည်။ အေးသန္တာကျော် ပေးဖတ်၍ သူတို့အိမ်မှရေးသော စာတွေကို လေးခင်မကြာမကြာ ဖတ်ရသည်။ မဖတ်ချင်၍လည်း မရ။ “မာမီက ဒီလို ရေးလိုက်တာ မလေးရဲ့” ဟု အစချီကာ အေးသန္တာကျော်က သူ့အမေစာကို အစအဆုံး ဖတ်ပြသည်။ သူ့အမေသည် ငယ်စဉ်ကပင် သာသနာပြုကျောင်းမှာ နေခဲ့သူဖြစ်၍ အင်္ဂလိပ်စာတော်ကြောင်း၊ အိမ်မှာ သူတို့ကို စကားပြောလျှင် အင်္ဂလိပ်လိုပင် ပြောကြောင်းကိုလည်း လေးခင် နားထောင် ရဖန်များ၍ ရိုးနေပေပြီ။
ယခုလည်း အေးသန္တာကျော်သည် စာကို လေးခင်မမြင်မြင်အောင် ရှေ့တိုးကာ ဖတ်သည်။ လေးခင်သည် အေးသန္တာကျော်၏ အသံထွက်စာဖတ်သံကို မကြားတစ်ချက် ကြားတစ်ချက် ဖြစ်နေသော်လည်း ကြားဟန်ပြုကာ နားထောင်နေရသည်။
“မာမီကတော့ သိပ်ကို စိတ်ပူတတ်တာပဲ၊ အရင်တစ်ပတ်က သန္တာစာပြန်တာ တစ်ရက်လေး နောက်ကျတာနဲ့ စိတ်ပူလို့တဲ့လေ၊ ဟင်း ဟင်း”
အေးသန္တာကျော်သည် စာရွက်ခေါက်လေးကို စာအိတ်ထဲသို့ တရိုတသေ ပြန်ထည့်ရင်း ပြောနေပြန်လေသည်။ လေးခင်သည် စားပွဲပေါ်ရှိ စာအုပ်ကို ပြန်၍ မျက်နှာမူလိုက်ရသော်လည်း စိတ်ထဲကတော့ ရွာမှာရှိသော အမေ့ကို မြင်ယောင် နေလေသည်။
“အမယ်လေး သနပ်ခါးတုံးတွေ ပြန်ထုတ်ထားခဲ့တယ်၊ ဒီလို သနပ်ခါးတုံး စစ်စစ် ကောင်းကောင်း ရန်ကုန်မှာ ဘယ်ရမလဲ လေးခင်ရယ်၊ ရဦးတော့ ဈေးကြီးမှာပေါ့၊ မိတ်ကပ်တွေ ဘာတွေလဲ မလိမ်းပါလေနဲ့အေ၊ တို့အသားနဲ့ မလိုက်ပါဘူး၊ ငါကလဲ တစ်နှစ်စာလောက်အောင် ထည့်ပေးထားတာအေရဲ့”
“လေးလွန်းလို့ပါ အမေရယ်”
“အိုအေ၊ ဒီက စံရွှေတို့ကားနဲ့ တင်ပေးလိုက်မယ်ဟာကို၊ ကိုယ်ရွက်သွားရမှာ လိုက်လို့”
“အမေ့ သရက်သီးတွေကလဲ ရှိသေးတယ်”
“စားရတာပေါ့ လေးခင်ရယ်၊ ဟိုရောက်ရင် သူငယ်ချင်းတွေလဲ လက်ဆောင် ပေးရ၊ ရောက်ရောက်ချင်း အဆောင်မှာ ထမင်းမရခင် ငါးပိကြော်လေးနဲ့ကော မမြည်း ရပါလား”
လေးခင်က သက်ပြင်းကို ခိုး၍ ရှိုက်လိုက်မိ၏။ တက္ကသိုလ်အဆောင်သို့ ပြန်သွားမည့် သမီးအတွက် အမေထည့်ပေးသည့် ပစ္စည်းတွေက စုံလင်လှသည်နှင့်အမျှ ၀န်စည် စလယ်ကလည်း များလှသည်။ ကားကြုံနှင့် တင်ပေးလိုက်မည် ဆိုသော်လည်း လမ်းဆုံမှ သဇင်ဆောင်ထိ သယ်သွားရမည့်ကိစ္စမှာ လွယ်ကူသည် မဟုတ်ချေ။ ပြီးတော့ ထင်းရှူး သေတ္တာတွေ၊ ခြင်းတွေထဲ သိုသိုသိပ်သိပ် ထည့်သွားရသည့် ပစ္စည်းတွေဆို သိပ်အရေးမကြီး၊ ကြံစည်းလို ထည့်မရ သိုမရ၊ လူမြင်ခံပြီး သယ်ရမည့် အရာတွေကိုတော့ လေးခင်က လုံးဝထားပစ်ခဲ့ရန် ဆုံးဖြတ်ရသည်။ လေးခင်တို့ အိမ်ခြေ လေးဆယ်ရွာမှာ အသီးအနှံပေါ၍ သရက်သီး၊ စိမ်းစားဥ၊ ကြံ၊ ပြောင်းဖူး စသည်တို့မှာ ရာသီအလိုက် ပေါ်မြဲဖြစ်၏။ အမေကလည်း သူ့ခြံထွက် ယာထွက်တွေကို သမီးအလှ တက္ကသိုလ် ကျောင်းသူကြီး စားစေချင်လွန်း၍ တခုတ်တရ လူကြုံပါးတတ်ပါ၏။
အမေ့ကို မသိတတ်ရန်ကောဟု အပြစ်မဆိုထိုက်သော်လည်း သယ်လာရသည့် လူကြုံတွေကို လေးခင် များစွာအားနာရ၏။ ယခုလည်း အမေက လေးခင်ကို ရတတ်သမျှ အသီးအနှံ တွေစုံအောင် ထည့်ပေးနေပြန်သည်။ အမေ့ကို “မယူချင်ဘူး” ဟု ပြောရန် စိတ်ကူးသော်လည်း လေးခင် သယ်မသွားချင်မှန်း အမေက ရိပ်မိဟန်ဖြင့် မျက်နှာမကောင်းတာ မြင်ရတော့ အားလုံး သိမ်းကျုံးသယ်သွားရန် ဆုံးဖြတ်ရပြန်သည်။
“လေးခင် စာမှန်မှန်ရေးနော်၊ ကျန်းမာရေးလဲ ဂရုစိုက်သိလား၊ အပြင်ချည်းပဲ ထွက်လည်မနေပါနဲ့အေ၊ ငွေကို ကိုစံပတို့ ရန်ကုန်သွားတိုင်း ထည့်ပေးလိုက်မယ်၊ ဆေးလဲ မှန်မှန်သောက်နော်၊ ၀မ်းချုပ်မခံနဲ့၊ ငါ ဖော်ထားတဲ့ဆေးက အ၀င်မဆိုးပါဘူး အေ၊ မနက် အိပ်ရာထ ကွမ်းသီးခြမ်းလောက်လေး မျိုရတာကို၊ အညောင်းပြေတယ်အေ့၊ ငယ်ငယ်ရွယ်ရွယ်နဲ့ မျက်မှန်ကြီး မတပ်ရအောင်ပါအေ”
“ဟုတ်ကဲ့၊ ဟုတ်ကဲ့”
လေးခင်၏ “ဟုတ်ကဲ့” သည် အမေ၏ ရှည်လျားသော မှာတမ်းကြီး မြန်မြန် ဖြတ်တောက်ပစ်ခြင်း ဖြစ်၏။
“ဘုရားလဲ မှန်မှန်ရှိခိုးနော်”
“အင်းပါ”
“လျက်ဆားပုလင်း ပါပြီလား”
“ပါပါတယ်”
“ရော့ အကြွေလေးတွေ ယူသွားဦး ဘတ်စ်ကားစီးတော့ အသင့်ဖြစ်တာပေ့ါ”
ပိုက်ဆံကိုတော့ လေးခင်က မြန်မြန်လှမ်းယူ၏။ မတ်စေ့နှင့် ငါးမူးစေ့လေးတွေမှာ အနည်းဆုံး နှစ်ဆယ်ဖိုးခန့်တော့ ရှိမည်။ အမေသည် ငယ်စဉ်ကပင် ပိုက်ဆံစုတာ ၀ါသနာပါ၏။ လေးခင်လည်း အစက ပိုက်ဆံစုတတ်သော်လည်း အဆောင်မှာ ကော်ရုပ် လေးထဲ ပိုက်ဆံအကြွေတွေ ထည့်သည်ကို အခန်းအဖော် အေးသန္တာကျော်က အံ့သြ ဟန်ဖြင့် ကြည့်သည်ကို မလုံမလဲဖြစ်ကာ ပိုက်ဆံမစုဖြစ်တော့ပေ။ နောက်တော့ စု၍ လည်းမရ။ အိမ်မှပို့သော ပိုက်ဆံကို အလျဉ်မီအောင် မနည်းသုံးနေရသည်။ အမေက ငွေကိုစာတိုက်မှ မပို့ဘဲ လူကြုံနှင့်ပို့သဖြင့် လူကြုံမလာလျှင် လေးခင်မှာ ငွေပြတ်တတ် သည်။ အမေ့ဆီ စာရေးတိုင်းလည်း ပြန်စာက မရတတ်ပေ။ အကြောင်းသော် အမေသည် စာကို ကောင်းစွာမရေးတတ်၍ သူများကို ရေးခိုင်းရသောကြောင့် ဖြစ်လေ၏။
ပထမနှစ် ကျောင်းရောက်စက အမေ့ဆီက စာတွေရောက်လာသေးသည်။ စာအိတ်ပေါ်မှာ ခဲ့တံဖြင့် ခပ်ဖိဖိရေးထားသော အမေ့လက်ရေးက စွေစောင်းနေသည့် အပြင် စာလုံးပေါင်းလည်း မှားသေးသည်။ တက္ကသိုလ်ရောက်မှ ပြောင်းသောလေးခင်၏ “လေးလေးခင်” ဟူသည့် နာမည်ကို “လေလေခင်” ဟု ရေးလိုက်သဖြင့် စာဝေသည့် မမက ရေးထားသည့်အတိုင်း ဖတ်လိုက်ရာ ကြားသူတွေက ရယ်ကြ၏။ လေးခင်က ရှက်လှသဖြင့် ငိုချင်ချင်ဖြစ်ကာ အနားမှာ အေးသန္တာကျော်မရှိသည်ကိုပင် ၀မ်းသာရပြန် သည်။
နောက်တော့ အမေစာရေးလျှင် ရွာမှာ သားဖွားဆရာမလုပ်နေသော မမကြည်ကို ရေးခိုင်းဖို့မှာရသည်။ ထိုအချိန်မှစ၍ အမေ့ဆီမှာစာတွေ အလာကျဲသွား သည်။ အကြောင်းထူးရှိမှ စာရေးတော့၏။ အမေ့လက်ရေးအစား မမကြည်၏ လက်ရေး ၀ိုင်းဝိုင်းစက်စက်လေးတွေကို အမေ့စာအဖြစ် လူတကာရှေ့မှာ ဖြန့်ဖတ်ရတိုင်း လေးခင် စိတ်ကမလုံ။ သို့သော် လေးခင်၏ ဘ၀မှန်ကို ရင်မဆိုင်ရဲသော တလွဲစိတ်က လေးခင်ကို လွှမ်းမိုးထားသည်။
အဆောင်က သူငယ်ချင်းတွေကတော့ အမေထည့်ပေးလိုက်သော စားစရာတွေ ကို ၀မ်းမြောက်ဝမ်းသာ မျှော်ကြစမြဲ။ “မလေးတို့ရွာကို လိုက်တောင်လိုက်ချင်ပြီကွာ” ဟု ပြောတတ်သည်။ လေးခင်ကတော့ အေးသန္တာကျော်တို့၏ ပြင်ဦးလွင် အိမ်ကြီးအတွင်းမှ ပင်စင်စား အရာရှိကြီး၏ မိသားစုတွေ တပျော်တပါး ၀ိုင်းဖွဲ့ပုံကို အတွေးဖြင့်မြင်ယောင် ကာ သူတို့များတော့ ကုသိုလ်ကောင်းလိုက်တာဟု တွေးနေမိ၏။
လေးခင်တို့မှာ ငယ်စဉ်ကပင် ယာထဲတွင် မြေပဲနုတ်ကာ စိမ်းစားဥနုတ်ကာဖြင့် ဘ၀စည်းစိမ်ကို မြေကြီးထဲမှ ရယူခဲ့သဖြင့် မြေနှင့် နီးစပ်လှပေသည်။ မုဆိုးမဖြစ်သူ အမေ့မှာ ရွှေတွေ ငွေတွေ စုဆောင်းထားနိုင်ခဲ့သော်လည်း လူနေမှု အဆင့်အတန်း ကတော့ တောသူတောင်သားတို့၏ သဘာဝက မတက်နိုင်။ အစ်ကိုအကြီး တစ်ယောက်က စစ်ထဲလိုက်သွားပြီး အစ်မတစ်ယောက်က အိမ်ထောင်ကျကာ တိုက်ကြီးမြို့မှာ ရောက်နေသော်လည်း အမေက သူ့ယာကို မစွန့်နိုင်။ သမီးထွေး လေးခင် ဘွဲ့ရ၍ အလုပ်ဝင်လျှင်သော်မှ ရွာမှာပဲ ကျောင်းဆရာမ ပြန်လုပ်စေချင်သည် တဲ့။ လေးခင်ကတော့ နောင်ခါလာ နောင်ခါဈေးပဲ။ နောက်မှ အမေ့ကို တဖြည်းဖြည်း နားချပြီး ရန်ကုန်ကို မပြောင်းနိုင်သော်မှ ပဲခူးလောက်၊ ညောင်လေးပင်လောက်တော့ ပြောင်းနေသော် ကောင်းမည်ဟု စိတ်ကူးလေသည်။
လေးခင်သည် အမေ့အကြောင်းကို တွေးနေဆဲ အေးသန္တာကျော်သည် သူ့အိမ်မှ လာသော စာခေါက်လေးကို စားပွဲပေါ် ပစ်တင်ကာ အင်္ဂလိပ်တေးသွားတစ်ခုကို ညည်းညူရင်း ရေချိုးခန်းသို့ ထွက်သွားလေသည်။
......................
အမေ့ဆီမှ စာမလာသည်မှာ တစ်လခန့်ကြာသွားသည်။ သည်ကြားထဲမှာ လေးခင် စာတစ်စောင် ထည့်လိုက်သေးသည်။ မမကြည်ဆီကိုလည်း တစ်စောင်သတ်သတ် ရေးရ၏။ အမေ့ကိုမေးပြီး ပြန်စာရေးပေးဖို့အကြောင်း တောင်းပန်ရသည်။ သို့သော် မမကြည်ဆီ ကလည်း ပြန်စာမရပေ။ အမေငွေပို့လိုက်သော လူကြုံကလည်း လေးခင်နှင့် လွဲသွားပြန်သည်။ ငွေနှင့် ပြောင်းဖူးတစ်စည်းကိုသာ လေးခင် ရရှိသည်။ စာကတော့ ပါမလာပေ။
စာမေးပွဲကနီးနေသဖြင့် လေးခင် ရွာပြန်၍လည်း မဖြစ်ပေ။ စာကျက်နေရသော် လည်း လေးခင်စိတ်က ရွာကို ပြန်ရောက်နေ၏။ လေးခင်တို့ ငယ်ငယ်က ရွာရှိ မူလတန်း ကျောင်းတွင် စာသင်ပြီး လေးတန်းအောင်သောအခါ ဒိုက်ဦးမြို့ အထက်တန်းကျောင်းကို သွားတက် ရသည်။ နံနက်စောစော ဈေးသည်တွေနှင့်အတူ လမ်းလျှောက်ပြီး ကျောင်းတက်ရသော ဘ၀ကို လေးခင်မမေ့။ ခုနစ်တန်းအောင်မှ အမေကလေးခင်ကို စက်ဘီးတစ်စီး ၀ယ်ပေးသည်။
ထိုနှစ်က အဖေဆုံး၍ အစ်မလည်း နောက်တစ်နှစ်မှာ အိမ်ထောင်ကျသည်။ ဦးကြီး၊ ဘကြီးများက လေးခင်ကို ကျောင်းထွက်စေချင်သော်လည်း အမေက မထွက်ခိုင်းပေ။ ဆယ်တန်းအောင်တော့လည်း ရွာမှာ အခြား မိန်းကလေးတွေလို သူနာပြုသင်တန်းတွေ၊ ဆရာဖြစ် သင်တန်းတွေ တက်ရန် မတိုက်တွန်းပေ။ လေးခင်ဆန္ဒအတိုင်း နေစေခဲ့သည်။ အမေ့ဆန္ဒက တစ်ခုတည်းသာ ရှိသည်။ လေးခင်ကိုတော့ သမီးထွေးမို့ အတူနေစေချင်သည်။ လေးခင်သွားချင်သည့် တက္ကသိုလ်ကို သွားပြီးလျှင် ရွာကို ပြန်လာစေချင်သည်။
လေးခင်သည် အမေ့အကြောင်း စဉ်းစားရင်း အမေ့မျက်နှာကို မြင်ယောင်လာ၏။ မြေကြီးထဲမှာ ကြက်လိုယက်၍ အစာရှာကျွေးရသော အမေ၊ မွေးကတည်းက အလုပ်နှင့် လက်နှင့်မပြတ်သော အမေ၊ နေလောင်နေသော အသားအရေ မွဲခြောက်ခြောက်ဖြင့် ကျရာနေရာမှာ နေခဲ့သော အမေ။ အမေသည် ငယ်စဉ်က ဘုန်းကြီးကျောင်းမှာသာ နေခဲ့ရ၏။ ခေတ်ပညာကို မတတ်ပေ။ ဘုန်းကြီးကျောင်းစာကိုပင် ရေးတတ် ဖတ်တတ် ရုံသာရှိ၍ အမေသည်စာကို သွက်သွက်ဖတ်တတ်သူ မဟုတ်ပေ။ အမေတို့ မိဘများက “သေစာ ရှင်စာတတ်ရင် တော်ရောပေါ့” ဟု သဘောထားခဲ့သူများ ဖြစ်၏။ အမေ့ လက်ထက်မှာတော့ သားသမီးတွေကို ခေတ်ပညာ သင်ပေးရန် ထက်သန်ခဲ့ပြီး။ အမေသည် သူ့ဘ၀ကို မြေကြီးထဲမှာ မြှုပ်နှံရင်း သားသမီးတွေကို မြှင့်ပေးလိုသော ဆန္ဒ ရှိသည်။
လေးခင်သည် အေးသန္တာကျော်၏ “မာမီကလေ” ဟူသော အသံလေးမှာ သာယာမနေနိုင်တော့ဘဲ အမေ့ကို တမ်းတမိပြန်၏။ ထို့ကြောင့် အမေ့ဆီ စာတစ်စောင် ကောက်ရေးပြန်သည်။
အမေ
အမေ့ဆီက စာမလာလို့ သမီးမျှော်နေပါတယ်။ အမေနေလို့ကောင်းရဲ့လား။ သမီးလဲ စာမေးပွဲနီးနေလို့ စာတွေ ကျက်နေရတယ်။ သမီး နေကောင်းပါတယ်။ လူကြုံနဲ့ ပို့လိုက်တဲ့ ငွေနဲ့ပြောင်းဖူးတွေ ရတယ်။ မမကြည်တို့အားရင် စားရေးခိုင်းပါဦး-
လေးခင်သည် အခန်းထဲသို့ ၀င်လာသော အေးသန္တာကျော်၏ အသံကို ကြားရသဖြင့် ရေးလက်စစာကို ကမန်းကတန်း ဖုံးထားလိုက်သည်။ အေးသန္တာကျော်က စာကို ယူဖတ်လျှင် လေးခင်၏ အမေကို စာမရေးတတ်မှန်း သိသွားက မခက်ပါလေလား။ ပထမအစမ်းစာမေးပွဲကို ပြီးသွားသည့်တိုင် အမေ့ဆီက စာမရောက် လာပေ။ လေးခင် စိတ်ပူလာသည်။ ရွာမှ လူကြုံကို မျှော်ရသည်။ ပြီးတော့ မမကြည်ဆီ စာတစ်စောင် သတ်သတ်ရေးသည်။ နောက်တော့ လေးခင် မနေနိုင်သဖြင့် မြို့ထဲမှ ဒိုက်ဦး-ညောင်လေးပင် ကားဂိတ်သို့သွားကာ ကားသမား ဦးစံရွှေကို ရှာသည်။
“ဦးလေး ရွာကို ၀င်ဖြစ်သေးလား၊ အမေ့ကို မတွေ့ဘူးလားဟင်၊ စာလဲမလာလို့”
“ဟေ နင့်အမေ အရင်တလောကတော့ နေမကောင်းဘူး ကြားတယ်၊ ခုတော့ ကိုင်းထဲ ပြန်ဆင်းနေပါပြီ”
“ဟုတ်လား၊ ကျွန်မလဲ စိတ်ပူနေတာ ဦးလေးရယ်၊ စာလဲမရလို့”
“နင့်အမေက စာရေးတတ်လို့လား”
လေးခင် ငိုင်သွားသည်။
“အင်း၊ ရေးတတ်ပါတယ်၊ ဟိုလေ မမကြည် မမကြည် သူ့စာနဲ့အတူတူ ထည့်ပေးနေကျပဲ”
လေးခင်က မတင်မကျ ဖြေသည်။
“သြော် အေးဟဲ့ ဟိုဆရာမ မငွေကြည်ရွာမှာ မရှိတော့ဘူးလေ ပြောင်းသွားပြီ”
“သြော် ဒါဖြင့် ဒီစာကို အမေ့ဆီ ဆက်ဆက်ပေးလိုက်ပါ၊ စာလဲ ဆက်ဆက် ပြန်ရေးပါလို့ ပြောပါနော်၊ ဦးလေးကို ပေးချင်လဲ ပေးလိုက်၊ ဒါမှမဟုတ်လဲ စာတိုက်က ထည့်ပေးလိုက်ပါလို့ ပြောပါ။ တစ်ရက်နှစ်ရက်နေရင် ကျွန်မ တစ်ခေါက်ထပ်လာခဲ့မယ်”
“အေး အေး”
လေးခင်အဆောင်ကို ပြန်ခဲ့သည်။ သြော်အခုတော့ အမေသည် သမီးတက္ကသိုလ် ကျောင်းသူဆီကို စာမရေးဝံ့ရှာတော့ပြီထင့်။ လေးခင်သည် ပထမဆုံးအကြိမ် ဘ၀မှန်ကို ရင်ဆိုင်ရန် အသိတရားရကာ မျက်ရည်လည်မိလေသည်။ လေးခင်တို့မှာ ဘာကိုများ ရှက်ရွံ့ဖုံးကွယ်စရာ ရှိသလဲ။ ဘ၀ကို နေရာယူတာချင်း မတူကြသော်လည်း ကိုယ့်ဘ၀နှင့်ကိုယ် ရည်ရွယ်ချက်တွေ၊ အားမာန်တွေ၊ သတ္တိတွေ ရှိကြသည်ပဲ။ ပြီးတော့ မိဘ၏ မေတ္တာတရားသည် ခေတ်မီလှပသော စာသားလေးတွေနဲ့သာ ဖော်ထုတ်လို့ ရသည်ချည်းမှ မဟုတ်ပါဘဲ။
........................
အေးသန္တာကျော်က “မာမီ့ဆီက စာလာတယ်” ဟု ပြောသော်လည်း လေးခင် သည် အားကျရမည်ဟု မထင်တော့ပေ။ အမေ့စာကိုသာ စိတ်စောစွာ မျှော်နေမိလေ၏။
အမေ့ဆီမှ လူကြုံဖြင့် ငွေနှစ်ရာ၊ သရက်သီးသနပ် တစ်ပုလင်းနှင့် စာတစ်စောင် ချက်ချင်းရောက်လာလေသည်။
သမိလေခင်
အမေ နေကောင်းသွားပါပြီး။ မကြည်တို့ ရွာဂ ပြောင်းသွားလို့ အမေစာမရေး။ အမေ စာကောင်ကောင် မရေတတ်လ်ို့ သမိရှက်မှာ စိုးတာကြောင့် စာမရေခြင် ဖြစ်သည်
လေးခင်သည် အမေ့စာကိုကိုင်ရင်း လက်တွေ တဆတ်ဆတ် တုန်လာ၏။ ရင်တွေ တလှပ်လှပ်ခုန်လာ၏။ “အို အမေရယ်” ဟု စိတ်တွင်းမှ တမ်းတမိ၏။ ရှက်ခြင်းနှင့် ၀မ်းနည်းခြင်း ရောထွေးကာ မျက်ရည်တွေကျလာ၏။ သည်တစ်ခါ လေးခင် ရှက်သည်က စားလုံးပေါင်းမမှန်၊ လက်ရေးမလှသော အမေ့စာကြောင့် မဟုတ်။ အမေ့ကို စိတ်ဆင်းရဲအောင် ပြုမိသော သူမ၏ အဓိပ္မာယ်မရှိသည့် စိတ်ဓာတ်ကိုသာ ဖြစ်၏။
ယခုတော့ အေးသန္တာကျော်၏ ခြေသံကိုလည်း လေးခင် ဂရုမစိုက်မိတော့။ အမေ၏ ညိုဝါညစ်နွမ်းသော စာရွက်လေးပေါ်မှ ယိမ်းယိုင်ရွဲ့စောင်းနေသည့် မှိန်လိုက် လင်းလိုက် စာလုံးလေးတွေပေါ်သို့ မျက်ရည်စက်တွေကိုသာ ခြွေချနေမိတော့လေတော့ သည်။
မိုးမိုး (အင်းလျား)
(လှိုင်းဘွဲ့ ။ ။ မေ၊ ၁၉၈၀)
No comments:
Post a Comment