ရတနာပုံ ရွှေမန္တလေးဝတ္ထု

'သူတော်'
'ဟဲ့ သူတော်....' စည်ရှင်ဘုန်းကြီးရဲ့ အသံ။
နောက်ဆုံးတခွန်းက ငေါက်သံပါပြီး၊ ပထမတခွန်းထက် ပိုမာလာတယ်။

'ဘုရား....'လို့ အမြန်ပြန်ထူးလိုက်ရတယ်။
'မြန်မြန်လာ.... မနက်တိုင်း နင့်စောင့်စောင့်နေရတာ နေမြင့်လှပြီ'
ကျောင်းတိုက်ရှေ့က တမာပင်အောင်မှာ တန်းစီပြီး၊ ဆွမ်းခံကြွကြမယ့် သံဃာတွေ
စုံနေကြပါပြီ၊ သုနန္ဒက ညစ်ပြီး ကျုပ်ကိုလှမ်းမခေါ်ဘူး။ ဆရာတော်တို့ရှိရာကို
သူအယင်သွားနှင့်ပြီး လူလုံးပြနေလို့သာ ကျုပ် ဒီလို အငေါက်ခံရတာပေါ့။

ကျုပ်ရဲ့ ပိတ်ဖြူကုလားနံကို သေသေချာချာ ပြင်ဝတ်ပြီး၊ လက်စွဲတော် ကြေးစည်နဲ့
တင်းပုတ်လေးကို ခေါင်းရင်းက ဘုရားစင်မှာရှာတော့ တင်းပုတ်လေးသာတွေ့ပြီး၊
ကြေးစည်က ဘယ်ရောက်နေမှန်းမသိ။ ကျောင်းသားတွေပဲ မနေ့ညနေက ယူဆော့
ကြပြီး နေရာတကျ ပြန်မထားတာလား။ သုနန္ဒကပဲ 'ချောက်'ချချင်လို့ ဖွက်ထားခဲ့
လေသလား။ သေသေချာချာ လှန်လှောရှာတော့၊ ကျုပ်ခြေရင်း သင်ဖြူးအောက်က
တွေ့တယ်။

ဒါ တယောက်ယောက်ရဲ့လက်ချက်ပဲ။ ကျုပ်ကတော့ သုနန္ဒ လက်ချက်
လို့ ထင်မိတယ်။ ကျုပ်အပေါ်မှာ သုနန္ဒက ဒီလို ခဏခဏညစ်နေကျ။

နေ့တိုင်းလို ပါပဲ၊ တမာပင်အောက် ကျုပ်ရောက်တဲ့အခါ ဦးပဉ္ဇင်းတွေ သင်္ဃန်းကို
လက်ကတော့ထိုးပြီးလို့ သပိတ်လွယ်ယင်း၊ ဝါစဉ်ကြီးငယ်အလိုက် နေရာယူ တန်းစီ
ပြီးနေကြပြီ။ ဆရာတော်ပါးစပ်က ဘာမှမပြောပဲ ကျုပ်ကို မျက်လုံးနဲ့
လှမ်းကြည့်လိုက်တယ်။ ဒီအကြည့်ရဲ့နောက်မှာ အဓိပ္ပာယ်တွေ တသီတသန်းကြီး
ပါလာတယ်။ ကြိမ်လုံးကြည့်ထား သူတော်၊ နောက်နေ့တွေ ဒီလိုနောက်ကျ
ယင်တော့ ဒဏ်ပေးမယ်။ ထကြွလုံ့လ နည်းရကောင်းလား သူတော်ဆိုတဲ့ အကြည့်၊
ဆုံးမတဲ့အကြည့်။

ဦးပဉ္ဇင်းတွေကတော့ ကျုပ်ဒီလိုအငေါက်ခံရတာ၊ အကြည့်ခံရတာကို သဘောကျ
နေကြပုံပါပဲ၊ ပြုံးတဲ့ ဦးပဉ္ဇင်းတွေက ပြုံးလို့၊ သူတော် သုနန္ဒကဆိုယင် သိပ်ကျေနပ်
တဲ့အပြုံးပေါ့၊ ခဏနေတော့ ဆရာတော်ကမိန့်ပါတယ်။

'ကဲ သူတော် ကြွ ... ကြွ'
ဘုန်းကြီးက ရိုးရိုးမိန့်တာပေမယ့်၊ ကျုပ်စိတ်ထဲမှာတော့ နည်းနည်း ငေါ့သံပါနေ
တယ်လို့ ထင်လိုက်မိတယ်။ နယုန်လ အရုဏ်ဦးရဲ့ လေပြေလေးတွေဟာ ဟိုဟိုဒီဒီ
ပြေးလွှားနေကြတယ်။ ဒီလေပြေလေးတွေက မစိုးရိမ်ကျောင်းတိုက် နာရီစင်ရဲ့
'ငါးနာရီထိုးပြီဟေ့' ဆိုတဲ့ နာရီတီးသံကို သယ်လာကြတယ်။ ကျောင်းတိုက်ရဲ့
မြောက်ဘက်တံခါးရောက်တော့ ငါးနာရီ ထိုးတဲ့ သင်္ကေတသံက ဆုံးသွားတယ်။

ဒီလိုဆို ကျုပ်တို့ ဘယ်နောက်ကျလို့တုန်း၊ ခါတိုင်းလိုပါပဲလား၊ အချိန်မှန်ပါရဲ့နဲ့။
မြောက်ဘက် တံခါးကထွက်တော့ ကြေးစည်ကို ထုံးစံအတိုင်း တီးတော့မယ်
အလုပ်မှာ သုနန္ဒက....

'အာဒိစ္စ ကြေးစည်တီးတော့လေ'တဲ့၊ ဆရာတော်မကြားအောင် အသံအုပ်အုပ်နဲ့
လှမ်းပြီးပြောတယ်။ သူတော်သုနန္ဒ သက်သက်မဲ့ဆရာလုပ်တာ၊ လျှာရှည်တာ၊
သူတော်လည်လုပ်တာ။ ကျုပ်အပေါ် တမင်လာညွန့်တာ၊ ကျုပ်သိတာပေါ့။
ချက်ခြင်းပဲ နောက်ကိုလှည့်ပြီး 'မိုက်ကြည့်' ကြည့်လိုက်တယ်။ သူ့ကိုရွဲ့ပြီး
ကြေးစည်ကို အကျယ်ကြီးတီးလိုက်တော့၊ ကြေးစည်သံဟာ ဝေဝေလွင်လွင်နဲ့
'အောင်ဓူဝံ'ရပ်ကွက်ထဲမှာ ပျံ့လွင့်သွားတယ်။

စိတ်ထဲမှာတော့ သုနန္ဒကို
တေးထားမိတယ်။ သူ ဝတ္ထုတွေ၊ ကာတွန်းတွေ ခိုးခိုးဖတ်နေတာ ဆရာတော်ကို
ကျုပ်မတိုင်ချင်လို့၊ တိုင်လိုက်လို့ကတော့ ဘာပြောကောင်းမလဲ။ ဒီသူတော်ကို
မြင်းခြံကားပေါ် တင်ပြီး ရွာပြန်ပို့ပစ်မှာ သေချာတယ်။

အောင်ဓူဝံရပ်ကွက်ဆိုတာလည်း လက်လုပ်လက်စားတွေ အနေများတော့ တဲတွေနဲ့
အိမ်တွေက လွှမ်းနေတာပေါ့။ တိုက်ဆိုလို့ နံကပ်တထပ်အဟောင်းကလေး နှစ်လုံး
ရှိရဲ့။ ဒီနံကပ်တိုက်က တိုက်ကလေးရှင်တွေကလည်း ဆွမ်းတွေဘာတွေ လောင်း
လေ့ မရှိကြပါဘူး။ ဘယ်မှာ အလှူတွေသွားလုပ်နေကြတယ်တော့ မပြောနိုင်ဘူး။

အံမယ် လမ်းတောင်ဘက်ထိပ် 'အာရောဂျံ တိုင်းရင်းဆေးတိုက်'က ဆရာကြီး
ကတော် ဒေါ်စိန်ဦးတောင် ဆွမ်းလောင်းမှကိုး။ ဟုတ်ပေသားပဲ။ ဒီနေ့ အင်္ဂါနေ့၊
ဆရာကြီး ကတော်မွေးနေ့။ ပြီးတော့ ပန်းထိမ်ဖိုကလည်း ဆွမ်းလောင်းတယ်။
အောင်ဓူဝံရပ်ကွက်မှာ ဒီနေ့တော့ ဒီနှစ်အိမ်ပဲ ဆွမ်းလောင်းလိုက်ကြတယ်။

ဆရာကြီးကတော် ဒေါ်စိန်ဦးကတော့ ထုံးစံအတိုင်း ကျုပ်အတွက် ဆွမ်းတဇွန်းကို
သူတော် သုနန္ဒရဲ့ ကျပ်ထဲ လောင်းနေကျ။ တချို့ တကာ တကာမတွေက ကျုပ်လို
ကြေးစည်တီးတဲ့ သူတော်ကို ထည့်တွက်ကြတာ မဟုတ်ဘူးလေ။

ကျောင်းရောက်တော့ တစားပွဲထဲအတူ ဆွမ်းစားကြပေမယ့်၊ တခါတလေတော့လည်း
သူတော် သုနန္ဒလို ကျပ်ကို ထမ်းချင်သေးတာပေါ့။ ကျပ်ကို သုနန္ဒက သူတော်
ပိုင်စီးထားတယ်။ ကျုပ်ကို တလှည့်မပေးဘူး၊ ကြေးစည်ချည်းပဲ နေ့တိုင်းတော့
ဘယ်သူတီးချင်မလဲ။ ကြေးစည်က ပေါ့ပေါ့ပါးပါးတော့ရှိပါရဲ့။ ကျပ်ဆိုတာ
ကြာလေညောင်းလေ လက်အံသေလာလေပေါ့။

ဒါပေမယ့် အရပ်ထဲမှာ ခွေးဟောင်
တော့ ရှေ့ဆုံးက ကြေးစည်တီးတဲ့ ကျုပ်ကို ဟောင်တာမဟုတ်လား။ ဦးဇင်း
ပြုံးညိုကတော့ ကြေးစည်တီးတဲ့ လူကနောင်ဘဝကျ အသံကောင်းတဲ့ နတ်သားတွေ
ဘာတွေဖြစ်နိုင်သတဲ့။ ဦးဇင်းပြုံးညို ပြောတဲ့စကားအတိုင်း တကယ်ဖြစ်လာ
ယင်တော့ မဆိုးပါဘူး။

အောင်ဓူဝံရပ်ကိုကျော်ခဲ့ပြီး ငှက်ပျောခြံထဲကိုရောက်တယ်။
ဒီခြံတွေထဲကလည်း သိပ်တော့ဆွမ်းလောင်းလေ့ မရှိဘူး။ တခါတရံ လောင်းကြ
တာပါ။ အလယ်ခြံက ဦးလေးကြီးကတော့ ထူးတယ်။ တနှစ်လုံးမှာ ဇူလိုင်လထဲမှာ
စောစောပိုင်းတရက်ပဲ ဆွမ်းလောင်းတယ်။ အဲဒီနေ့ကျယင် ပြက္ခဒိန်မကြည့်နဲ့တော့။
တပြည်လုံးဝမ်းနည်းကြေကွဲကြတဲ့နေ့ပဲ၊စတုတ္ထခြံက ဆွမ်းခပ်နီနီတွေ လောင်းတယ်။
အခုထိတော့ သပိတ်ထဲက ဝတ်ခွက်တွေဟာ ချောင်ချိအားလပ်နေတုန်းပါပဲ။

ငှက်ပျောခြံကိုကျော်ပြီး မြတောင်ကျောင်းတိုက် အနောက်မြောက်ထောင့်မှာ
ခဏရပ်ကြတယ်။ ကျုပ်တို့ကျောင်းရဲ့ အရှေ့ဘက် ဒဟတ္တောရပ်တို့၊ ရှမ်းဝိုင်းတို့၊
မုန့်တီစုရပ်တို့ထဲက တကာ၊ တကာမတွေဆီက ဆွမ်းခံပြီး မြို့ထဲကို ကျုပ်တို့နဲ့
ဆွမ်းခံ အတူကြွကြမယ့် သံဃာတော်တွေ ဒီနေရာမှာ လာပေါင်းကြပါတယ်။

ကျောင်းကအထွက်မှာ ကျုပ်တို့နဲ့ အတူထွက်ခဲ့တဲ့ သံဃာတော်တွေထဲက
ဒေးဝန်းတို့၊ ဂေါဝိန်တို့ကို ဆွမ်းခံကြွကြမယ့် ဘုန်းကြီးတွေလည်း ဒီနေရာကနေ
ခွဲပြီး အနောက်ဘက်ကို ကြွကြတယ်။ ခဏနေတော့ ဆရာတော်က 'သူတော်
အာဒိစ္စ'တဲ့။
နောက်ထပ် တခွန်းမှ ဆက်မိန့်စရာမလိုတော့ဘူး။ ကျုပ်က ကြေးစည် ကောက်တီး
လိုက်တယ်။ ရှေ့ဆက်ပြီး ဆွမ်းခံကြွ တော့မယ်ဆိုတဲ့ သင်္ကေတဆိုလည်း ဟုတ်ရဲ့။

ကျုပ်တို့သံဃာတန်းဟာ အခုဆိုယင် အပါးအစိတ်လေက်ရှိပြီ။ ရှေ့ဆုံးကကျုပ်၊
ပြီးတော့ သူတော် သုနန္ဒ၊ နောက်က ဆရာတော်၊ ဆရာတော်နောက်ကမှ
ဦးပဉ္ဇင်းတွေ ဝါစဉ်လိုက်လို့၊ နောက်ဆုံးက ကိုရင် ဘဒ္ဒိယတို့၊ ကိုရင် ဇောတိကတို့၊
ရှင်ပဒုမ တို့ ... ။

မလွန်ရပ်ကွက်ကြီးထဲက မလွန် နီးပါးတန်းတို့၊ မလွန်ပုတ်တန်းတို့၊ မလွန်
ကြက်သွန်တန်းတို့၊ မလွန် ချင်းတန်းတို့ဆိုတဲ့ ရပ်ကွက်စိပ်ကလေးတွေထဲ ကျုပ်တို့
လွန်းထိုးပြီးဆွမ်းခံတယ်။

မလွန်ရပ်ဆိုတာ အရောင်းအဝယ်သမားတွေ အနေများ
ကြတဲ့ ဗုဒ္ဓဘာသာ မြန်မာရပ်ကွက် စစ်စစ်ပေါ့။ လမ်းထောင့်က ပွဲရုံက အမေကြီးက
ဆွမ်းလောင်းနေကျ၊ ပွဲကတော်က အသက်ကြီးပြီမို့ ပွဲရုံရှေ့ရောက်ခါနီးယင်
ကျုပ်က ကြေးစည်ကို ခပ်ကျယ်ကျယ်နဲ့ ခဏခဏတီးပေးရတယ်။ ပွဲကတော်ကြီးက
နားနည်းနည်းလေးတယ်လေ။ ပွဲကတော်ရဲ့ ဆွမ်းတွေကဖြူဖွေးပြီး အငွေ့တထောင်း
ထောင်း ထနေလေ့ရှိတယ်။ ဆွမ်းက မွှေးလည်းမွှေးတယ်။

ဒီနေ့ဝတ်ခွက်တွေထဲကို စပြီးနေရာယူတဲ့ ပဲရေပွကို ကားဝပ်ရှော့က ဝပ်ရှော့ဆရာ
ကတော်က လောင်းတယ်။ ပဲရေဖွထားပုံ က ရဲတွတ်နေတာပဲ၊ ဆီနည်းတာတခုပဲ
ပြောစရာရှိတယ်။ အဝေးပြေးကားဂိတ်က ဘယာကြော်လောင်းတယ်။ မှတ်မှတ်ရရ
တပေါင်းလဆုတ် ရှစ်ရက်နေ့က သပိတ်တွေထဲမှာ ဘယာကြော်တွေ အများကြီး
ရတဲ့နေ့။ အဲဒီနေ့က မန္တလေးမြို့လယ်ခေါင်ကို မီးလောင်တာ နှစ်ပတ်လည်တဲ့နေ့။
ဘေးဘယာတွေကို ကျော်လွှားကြဖို့ ရည်စူးကြတယ်ထင်ပါရဲ့။

မလွန်ချင်းတန်း တောင်ဘက်အစွန်က 'ခွေးသတိ' ဆိုတဲ့ ဆိုင်းဘုတ်ရှိတဲ့အိမ်က
ပဲပြုတ်လောင်းတယ်။ ပဲပြုတ်ကတော့ ဆီလေးပါလေခါနဲ့။ ပြီးတော့ ဈေးချိုထဲမှာ
လက်ဖက်နဲ့ အကြော်စုံရောင်းတဲ့ အမေကြီးက နိစ္စဘတ်ဆွမ်းနဲ့ ဆွမ်းဟင်းတခွက်
လောင်းနေကျ။ ဒီနေ့တော့ ကြက်ဟင်းခါးသီးချက်လောင်းတယ်။ ဆရာတော့်
အကြိုက်။ အခါးက သက်ကြီးဝါကြီးတွေနဲ့ တည့်တယ်ဆိုမဟုတ်လား။

အဲဒီအိမ်ပြီးတော့ ဆွမ်း နီကြင်ကြင်တွေ ထပ်ရသေးတယ်။ ၃၃လမ်းဒေါင့်က
အဝီစိတွင်းတူးထားပြီး ရေရောင်းတဲ့အိမ်ကလည်း နိစ္စဘတ်ဆွမ်းနဲ့ ဆွမ်းဟင်း
တခွက်၊ ဒီနေ့တော့ ဘယာကြော်ချက်တဲ့၊ ဒီဒကာမကြီးက ပုရစ်ကြော် သိပ်ကြိုက်ပုံ
ရတယ်။ ပုရစ်ပေါ်တဲ့ရာသီဆိုယင် ပုရစ်ကြော်ကို ဆွမ်းဟင်းတခွက်အနေနဲ့
ခဏခဏလောင်းတယ်။ ဗိုက်ထဲမှာ ဥတွေနဲ့ ပုရစ်အမကြီးတွေ၊ ချင်းနဲ့ ကြက်သွန်
ဖြူနဲ့ ကြော်ထားတာ၊ အဲဒါကတော့ ကျုပ်တို့၊ ဘဒ္ဒိယတို့အကြိုက်ပေါ့။

ခုနကပြောတဲ့ မန္တလေး မီးကြီးမလောင်ခင်က ကျုပ်တို့ ဆွမ်းတွေ ဆွမ်းဟင်းတွေ
လှိုင်ပေါလယ်နေတာပေါ့။ ဒီမီးကြီးထဲမှာ ကျုပ်တို့ရဲ့ နိစ္စဘတ် ဆွမ်းတကာတွေရဲ့
အိမ်တွေအများကြီး ပါသွားတယ်။ အခုတော့ တချို့ ဆွမ်းတကာတွေပဲ
ရှိတော့တယ်။ တချို့လည်း ရေကြည်ရာ ရေပေါရာအရပ်ကို ပြောင်းသွားကြပြီ။
မီးလောင်ပြီးမှ တချို့လည်း နိစ္စဘတ်ဆွမ်း မလောင်းတော့ပဲ အလျဉ်းသင့်သလို
လောင်းလှူကြတယ်။ ဆွမ်းတကာ တကာမ အသစ်တွေကလည်း တိုးတော့တိုးလာ
ပါရဲ့။ အယင်ကလောက်တော့ မများသေးဘူး။

မန္တလေးမြို့ရဲ့ အသည်းနှလုံးကို
နှုတ်သွားတဲ့မီးကြီး။ နည်းတဲ့ မီးကြီးလားဗျာ၊ အခုတော့ အသည်းနှလုံးအသစ်နဲ့
ဆိုပေမယ့် ဘယ်အသားကျအုံးမလဲ။ ဒီဒဏ်က နည်းတဲ့ဒဏ်မှမဟုတ်ပဲ။ မီးလောင်ခံ
ရတဲ့ လူထုက ပြာပုံထဲက ကုန်းရုန်းထကြရတာ။ ဒါကြောင့် ဆွမ်းကွမ်း
မလောင်းနိုင်ကြသေးတာ ကျုပ်တို့သိတာပေါ့။ ဒီလိုမဟုတ်ယင် မြန်မာလူမျိုး
ပါတဲ့ဗျာ၊ အလှူရေစက် လက်နဲ့ မကွာတဲ့ လူမျိုး။ တချို့ကလည်း မီးလောင်ပြီးမှ
'မီးညွန့်တက်'လာကြသတဲ့၊ အယင်က တထပ်တိုက်နဲ့လူက အခု နှစ်ထက်သုံးထပ်။
အယင်က နှစ်ထပ်က အခု သုံးထပ်လေးထပ်၊ ဒါကတော့ လူနည်းစုဗျ။

တချို့လည်း လူသစ်တွေ၊ ကျုပ်တို့ မျက်မှန်းမတန်းမိတဲ့ သူတွေ။
သုနန္ဒစာချိုး ချိုးနေတဲ့ ခင်မောင်ဝင်း-ချဉ်ပေါင်ဟင်းဆိုတဲ့၊ ချဉ်ပေါင်ဟင်း အများ
ဆုံးလောင်းနေကျ တကာတော့ အဆောက်အဦ ပြန်မဆောက်နိုင်ရှာဘူး။
သူ့မြေကွက်မှာ စုံစမ်းရန် ''ညွန့်ဝေဆံသ၊ ၃၂-လမ်း''ဆိုတဲ့ ဆိုင်းဘုတ်
ထောင်ထားပုံထောက်တော့ မြေရောင်းရတော့မယ့် ပုံပဲ။

အခါကြီး ရက်ကြီးဆိုယင်
ပုန်းရည်နဲ့ဝက်သားတို့၊ ဝက်ခြေထောက်ရိုးနဲ့ လက်ပံခေါင်းချဉ်ရည်တို့ လောင်းလှူ
တတ်တဲ့ တကာမကြီးတို့ကတော့ အိမ်ငှားနေမယ့်လူဆီက စပေါ်ယူပြီး နံကပ်တိုက်
ကလေးဆောက်ကာ ဆေးတောင်မသုတ်ရသေးဘူး၊ အထက်ထပ်မှာ သူတို့နေကြ
တယ်။ အောက်ထပ်တော့ အိမ်ငှားက စာအုပ်နဲ့ ကက်ဆက်ခွေ အငှားဆိုင်ဖွင့်လို့၊ ခု
ဒီနည်းနဲ့ လူတော် တော်များများက ပြန်ထူထောင်နေကြတယ်လေ။

ဗိုလ်ချုပ်လမ်းကျော်ယင် အသည်းနှလုံး အစားထိုးထားတဲ့ ရပ်ကွက်အသစ်ကို
ရောက်ပါပြီ။ ဗိုလ်ချုပ်လမ်းကျော်လိုက်တော့ ရွှေဖရုံသီချက်လောင်းလှူတဲ့သူနဲ့
ကြုံရတယ်။ နောက်တကာတဦးက ဆွမ်းချည်းပဲ လောင်းတယ်။ ပြီးတော့
ဟိုတလောကမှဖွင့်တဲ့ တည်းခိုခန်းရှင် အသားဝါဝါနဲ့ တကာမပုပုက ဝက်အူချောင်း
လက်နှစ်ဆစ်လောက်စီ ပိုင်းပြီး လောင်းတယ်။ တပါးကို ဘယ်နှစ် ချောင်းလောင်း
သလဲတော့ ကျုပ်လည်းမသိဘူး။ ကျုပ်ဖို့ရော သုနန္ဒကျပ်ထဲ ထည့်လောင်း
ရဲ့လားမသိ။

ရေခဲစက်ကလည်း ဆွမ်းပဲ လောင်းတယ်။ ဆောက်လက်စ နှစ်ထပ်
တိုက်က ရွှေသွားတွေနဲ့ အမယ်ကြီးက အီကြာကွေးတွေ လောင်းတယ်။
တိုက်သံတံခါးရဲ့ နောက်က ခွေးအမည်းကြီးကတော့ အစွယ်တွေဖြဲလို့။ အယင်က
ဒီနေရာမှာ ပျဉ်ထောင်အိမ်ကလေးရှိတယ်လေ။

ဒီလိုအီကြာကွေးလောင်းတိုင်း
ဆွမ်းစားကျောင်း စားပွဲပေါ်က ဘယ်သူမှ မတို့မထိကြတဲ့ အီကြာကွေးထည့်ထားတဲ့
လင်ပန်းကြီးကို ပြန်မြင်ယောင်မိတယ်။ တခါတလေ နှီးအုပ်ဆောင်းရဲ့အမိုးကို
အီကြာကွေးပုံကြီးကထိလို့။ ဘုန်းကြီးက ကျောင်းကိုလာတဲ့ ဧည့်သည်တို့၊ အာဂန္တု
ဘုန်းကြီးတို့ကို ဒီမုန့်တွေနဲ့ ဧည့်ခံလေ့ရှိတယ်။ ဧည့်သည်တွေက သိပ်မကြိုက်
ကြပါဘူး။

တပြဆက်သွားပြီး မြောက်ဖက်ချိုးလိုက်တော့ ထီဆိုင်က တိုရကြော်
လောင်းတယ်။ တိုရကြော်ပြီးတော့ ခပ်ဝဝ ဦးလေးကြီးက ဆွမ်းလောင်းတယ်။
မြင်ဖူးနေကျမဟုတ်ပါဘူး။ ဝင်းကြားထဲက ထွက်လောင်းတာနေမှာပါ။
ဆွမ်းလောင်းတယ်ဆိုတာလည်း ရည်ရွယ်ချက်က အမျိုးမျိုး နိဗ္ဗာန်ကိုရည်သန်လို့၊
မွေးနေ့မို့၊ ယတြာကြောင့်၊ သွားလေသူအတွက် ရည်စူးလို့၊ အကျဉ်းအကျပ်
ရောက်နေသူအတွက်၊ အကြောင်းကြောင်းကြောင့်။

ဆံပင် အလှပြင်ဆိုင်တခုက ဘယာကြော် လောင်းလှူတယ်။ ဒီတကာမကြီးက
အကြော်နှစ်ခုစီပူးပြီး ကိုင်ထားပုံထောက်တော့ တပါးကို ဘယာကြော်နှစ်ခုစီ
လောင်းတယ်ထင်ပါရဲ့၊ ဒီဆိုင်နဲ့မျက်စောင်းထိုး အနောက်ဘက်တန်းက တည်းခို
ခန်းကလည်း အီကြာကွေးတွေ လောင်းလှူပြန်တယ်။

ကျုပ်က နောက်ကို အသာလေးလှည့်ကြည့်တော့ ကျုပ်လိုပဲ သုနန္ဒလည်း
အီကြာကွေးတွေ ကြည့်ပြီး စိတ်မချမ်းမသာဖြစ်နေပုံပဲ၊
လောင်းလှူနေတဲ့ မျက်ပေါက်ကျဉ်းကျဉ်း တကာမ
မသိအောင် ကျုပ်ကို မဲ့တယ်ဆိုရုံကလေး မဲ့ပြတယ်။

အဲဒီကနေဆက်ပြီး မြောက်ဘက် တပြလျှောက်ကြ၊ ၂၉-လမ်းရောက်တော့ အနောက်
ဝါးတန်းဘက်ဆင်းပြီး ကျောင်းကို ပြန်ကြွနေကျပေါ့။

အပြန်လမ်းမှာ ဆွမ်းလောင်းတဲ့ အိမ်တအိမ်၊ ငပိချက်လား၊ မန်းကျည်းသီး
ချက်လားမသိ၊ အပေါ်ဆီပြန်နေတဲ့ ဆွမ်းဟင်းကတခွက်၊ ပြီးတော့ ဘယာကြော်
ချက်၊ နောက်ပြီးတော့ လျှပ်စစ်ပစ္စည်းရောင်းတဲ့ အသားဖြူဖြူ မျက်လုံးမှေးမှေးနဲ့
တကာမက အီကြာကွေးလောင်းပြန်ပါတယ်။အဲဒီဆိုင်ရှေ့ကထွက်လို့ ခပ်လှမ်းလှမ်း
ရောက်တော့ သုနန္ဒက ကျုပ်ကို စကားတခွန်း အသံခပ်အုပ်အုပ်နဲ့ လှမ်းပြောပါ
တယ်။ ကျုပ်လည်း ကြေးစည်သံနဲ့မို့ ဘာပြောမှန်းမသိလိုက်ဘူး။ ဘာများတုန်းလို့
နောက်လှည့်ကြည့်တော့ သုနန္ဒက ဘာမှမပြောသလို ခပ်တည်တည်ပါပဲ၊
ကျုပ်လည်း အရေးမကြီးပေဘူးထင်လို့ ကျောင်းကျမှ မေးတော့မယ်လို့
အောက်မေ့လိုက် တယ်။

ကျောင်းအပြန်လမ်းမှာ ဝါးတန်းနဲ့ ဒေါင်းရိုးရပ်ကလည်း
ဆွမ်းတွေ၊ ဆွမ်းဟင်းတွေ တော်တော်ရပါတယ်။

ဆွမ်းစားကျောင်းပေါ်မှာ ဆရာတော်နဲ့ ဘုန်းကြီးတွေက အရှေ့ဘက် စားပွဲဝိုင်း
တဝိုင်း၊ ဦးပဉ္ဇင်းကြီးတွေနဲ့ ဦးပဉ္ဇင်းလေးတွေက အနောက်ဘက်က စားပွဲဝိုင်းနဲ့
နှစ်ဝိုင်း၊ ပြီးတော့မှ ကိုရင်ကြီးတွေ၊ ကိုရင်တွေက တောင်ဘက်ကတဝိုင်း၊
မြောက်ဘက်က တဝိုင်း၊ ကျုပ်တို့ကျောင်းကတော့ ဒီလိုပဲစုပြီး ဘုဉ်းပေးနေကျ။

ဆွမ်းဘုဉ်းပေးယင် စည်းနဲ့ကမ်းနဲ့ တိတ်လို့ဆိတ်လို့။ သူတော်တွေနဲ့ ကျောင်းသား
တွေက ဆရာတော် ဆွမ်းဘုဉ်းပေးတုန်း ယင်ယပ်ပေးရ၊ ဆားပေးဆီယူ တောက်တို
မယ်ရ လုပ်ပေးရတာပေါ့။ ဆရာတော်များ၊ သံဃာတော်များ ဘုဉ်းပေးပြီးမှ ကျုပ်တို့
သူတော်တွေနဲ့ ပေသီးတို့၊ ချက်ဖေါင်းတို့ ကျောင်းသားတွေ စားကြရတယ်။

ဆရာတော်က ဆွမ်းဘုဉ်းပေးပြီးလို့ လက်ဖက်ရည်ကြမ်းနဲ့ ဧလမုန့်၊ ငှက်ပျောသီး
ကြော်စတဲ့ အချိုကို ဘုဉ်းပေးယင်း သူတော်သုနန္ဒကို လှမ်းခေါ်လိုက်တယ်။
ကျုပ်က ခပ်လှမ်းလှမ်းရောက်နေလို့ ဆရာတော်မိန့်တာ အကုန်မကြားရဘူး။
.....................
.....................
''မေ့သွားလို့ပါဘုရား''
''ဘာမေ့သွားလို့လဲ၊ နောက် ဆွမ်းခံကြွယင်းစကားပြောယင် ကြိမ်နဲ့အဆော်ပဲ''

ဆရာတော်က ဆွမ်းခံယင် ဣနြေ္ဒနဲ့ကြွဖို့ ကျုပ်တို့ကို အမြဲဆုံးမနေကျ။ အခုနေ
ကျုပ် သူတော်သုနန္ဒ ဝတ္ထုနဲ့ကာတွန်းတွေ ခိုးဖတ်တဲ့အကြောင်း အဆင်းတွန်းလိုက်
ရယင်တော့ အကွက်ကောင်း ပေါ့။ သုနန္ဒကတော့ ငြိမ်လို့၊ မျက်လွှာကလေး
အောက်ချလို့ အပြစ်ရှိကြောင်း သူ့မျက်နှာက သက်သေခံနေတယ်။

''နင်ပြောတဲ့စကားကို ငါမကြားဘူး မှတ်သလား''
ဆရာတော်ရဲ့ အသံက ခုနကထက် ပိုမာလာတယ်။ မနက်က ကျုပ်ကို ဆရာတော်
ငေါက်တယ်။ အခုနေ့လည်ကျ သုနန္ဒ အလှည့်၊ ကျုပ် အဆင်းတွန်းစရာတောင်
မလိုတော့ဘူးလေ။

''နောင် ဒီလိုပြောသံကြားယင် သဲဒဏ် ရေဒဏ်ပေးမယ် ကြားလား''
''မှန်...မှန်ပါ့ဘုရား'
''သူတော်က ဘာများပြောလို့တုန်း ဘုရား''
ဦးဇင်းပြုံးညိုက ဖြတ်ပြီး မေးပါတယ်။
''အီကြာကွေးတွေလောင်းလှူတော့ ဘာတဲ့ နင်ပြောတာ'''

သုနန္ဒကြည့်ရတာ ကြောက်နေပုံပဲ၊ တော်တော်နဲ့ စကားပြောမထွက်ဘူး။
''မှန်...မှန်ပါ၊ ကြာယင် ဘိုးသူတော် မျက်စိလည်လေ၊ အီကြာကွေးရလေ
ဖြစ်ကုန်တော့မှာပဲလို့ ပြောမိတာပါ ဘုရား''

သူ့စကားကြားတော့ ကျုပ်တို့ရယ်မိတယ်။ ဘဒ္ဒိယနဲ့ ချက်ဖောင်းတို့ကဆိုယင်
အသံများတောင်ထွက်လို့ ရယ်လိုက်ကြတာ။ သူ့စကားကြောင့် သတိရလို့ ပုဂံစင်
နားက နှီးအုပ်ဆောင်းကို လှမ်းကြည့်မိတော့ သူပြောလည်း ပြောစရာပဲ၊ 'သုနန္ဒပြော
တာတွေ' နည်းလိုက်ပေါင်ဗျာ။

ဒါပေမယ့် ကိုယ်တော်ကြီးတွေ၊ ဦးပဉ္ဇင်းတွေက
ရယ်ဖို့နေနေသာသာ ပြုံးတောင် မပြုံးကြဘူး။ ကျုပ်တို့အဖို့ ပြက်လုံးကြီးတလုံးလို
ရယ်စရာကောင်းတဲ့စကားကို၊ ဘာလို့ မပြုံးကြတာလည်းတော့ကျုပ်လည်းမသိဘူး။
သက်ကြီးဝါကြီးဆိုတာ အမြော်အမြင် ကြီးတယ်မဟုတ်လား။ ဘာလို့ မရယ်ကြ
မပြုံးကြသလဲ ....။ ပြီးမှ ဦးပဉ္ဇင်းတွေကို မေးရအုံးမယ်။

ညီပုလေး
ရင်ခုန်ပွင့်၊ ၁၉၈၇၊ ဇူလိုင်။